टीव्ही डिबेट दरम्यान एका आमदाराने दुसऱ्या आमदाराचा गळा पकडला; लाइव्ह कार्यक्रमातच दे दणादण हाणामारीचा घडला प्रकार

तेलंगाणातील एका वृत्तवाहिनीवर लाइव्ह चर्चेदरम्यान, सत्ताधारी पक्ष भारत राष्ट्र समिती (BRS) च्या एका आमदाराने भाजपच्या उमेदवाराला मारहाण केली. त्याचा व्हिडिओ सोशल मीडियावर समोर आला आहे. लाइव्ह कार्यक्रमात प्रश्नोत्तराच्या सत्रादरम्यान, बीआरएस आमदार केपी विवेकानंद यांनी भाजप नेते कुना श्रीशैलम गौर यांचा गळा पकडला.

बीआरएस आमदारांनी भाजप नेत्याशी बाचाबाची सुरू केली. यावेळी प्रेक्षकांच्या गर्दीत बसलेले कार्यकर्ते स्टेजच्या दिशेने धावले. लोकांनी स्टेजवर येऊन हस्तक्षेप केला. आपल्या उमेदवारासोबत घडलेल्या या घटनेवर भाजपने टीका केली आहे.

तेलंगाणा भाजपचे प्रदेशाध्यक्ष आणि केंद्रीय मंत्री जी किशन रेड्डी यांनी सोशल मीडियावर लिहिले - कुतुबल्लापूरमधील भाजप आमदार उमेदवार कुनाश्री सालेम यांच्यावर बीआरएस आमदाराने हल्ला केला. निवडणूक लढवणाऱ्या विरोधी उमेदवारावर जाहीर हल्ला होणे धक्कादायक आहे.

जर बीआरएस दुसर्‍यांदा सत्तेवर आली तर सामान्य लोकांवरही असाच हल्ला होईल. तेलंगाणातील लोकांनी सावध राहावे. केपी विवेकानंद यांना निवडणूक लढवण्यास अपात्र ठरवण्याची मागणी भाजपने निवडणूक आयोगाकडे केली आहे.

विधानसभा निवडणुकीबाबत बीआरएस पक्ष नैराश्यात आहे

या घटनेबाबत भाजपचे ज्येष्ठ नेते आणि ओबीसी मोर्चाचे प्रमुख के लक्ष्मण म्हणाले की, विरोधी पक्ष टीव्हीवरील चर्चेत सरकारला प्रश्न विचारतात. त्यांनी प्रश्नांची उत्तरे दिली पाहिजे. मात्र निवडणूक हरण्याच्या भीतीने बीआरएस हतबल झाला आहे. बीआरएस आमदाराने भाजप उमेदवारावर ज्या प्रकारे हल्ला चढवला त्यावरून बीआरएस नैराश्यात असल्याचे स्पष्ट होते.

तेलंगाणामध्ये 30 नोव्हेंबर रोजी विधानसभा निवडणुकीसाठी मतदान होत आहे

तेलंगाणात 30 नोव्हेंबरला 119 जागांसाठी निवडणूक होणार आहे. निवडणूक आयोगाने तेलंगाणा, मध्य प्रदेश, छत्तीसगड, राजस्थान आणि मिझोराममध्ये 9 ऑक्टोबर रोजी मतदानाची तारीख जाहीर केली होती. पाचही राज्यांतील निवडणुकीचे निकाल 3 डिसेंबरला जाहीर होतील.