विद्यार्थिनीवर कारागृह पोलिसाचा बलात्कार:पीडिता करत होती स्पर्धा परीक्षेची तयारी

स्पर्धा परीक्षेची तयारी करणाऱ्या विद्यार्थिनीवर कारागृह पोलिसाने बलात्कार केल्याची संतापजनक घटना छत्रपती संभाजीनगर येथे घडली आहे.

यासंबंधीच्या वृत्तानुसार, आरोपी पोलिसाने पीडित तरुणीसोबतच्या ओळखीचा गैरफायदा घेऊन तिच्यावर वारंवार बलात्कार केला. यासाठी त्याने लग्नाचे खोटे आमिषही दाखवले होते. पण नोकरी लागल्यानंतर त्याने दुसऱ्याच एका तरुणीसोबत अफेअर सुरू केले. ही बाब लक्षात येताच पीडित तरुणीने सिडको पोलिस ठाणे गाठून आरोपीविरोधात तक्रार दाखल केली.

शुभम नरेश गोसटकर (रा. आडुळ, ता. पैठण) असे आरोपीचे नाव आहे. तो धुळे कारागृहात पोलिस अंमलदार म्हणून कार्यरत आहे. त्याच्यावर छत्रपती संभाजीनगर येथील सिडको पोलिस ठाण्यात गुन्हा दाखल करण्यात आला आहे.

ओळखीचे प्रेमात झाले होते रुपांतर

पोलिसांनी दिलेल्या माहितीनुसार, पीडित तरुणी स्पर्धा परिक्षेच्या तयारीसाठी शहरात आली होती. 2020 मध्ये तिची ओळख स्पर्धा परिक्षेची तयारी करणाऱ्या शुभम नरेश गोसटकर याच्यासोबत झाली. या ओळखीचे रूपांतर कालांतराने प्रेमात झाले. शुभम याने तरूणीला रूमवर जिवाचे बरे वाईट करण्याची धमकी देऊन बोलावून घेतले. तिच्यासोबत बळजबरीने शारिरीक संबंध प्रस्थापित केले. यानंतर सदर तरूणीने तिच्यापासून विभक्त राहण्याचा प्रयत्न केला असता, शुभम गोसटकर याने तिच्यासोबत लग्न करण्याचे आमिष दाखविले. 2020 ते सप्टेंबर 2023 या काळात त्याने अनेकदा तिच्यावर बलात्कार केला.

नोकरी लागल्यानंतर दुसरीशी सूत जुळले

या काळात शुभम गोसटकर धुळे कारागृह येथे पोलिस कॉन्स्टेबल म्हणून नोकरीला लागला. नोकरीनंतर सदर तरूणीला शुभम गोसटकर याचे अन्य तरूणीशी संबंध असल्याची माहिती मिळाली. याबाबत विचारणा केली असता, शुभम गोसटकर याने सदर तरूणीला बोलणेही टाळले. या प्रकरणात तरूणीच्या तक्रारीवरून शुभम गोसटकर याच्या विरोधात सिडको पोलिस ठाण्यात गुन्हा दाखल करण्यात आला आहे.