चक्क वकिलाचे चोरट्याला विनम्र आवाहन, मला त्रास देऊ नका माझ्या कडे शस्त्र परवाना आहे पण गोळ्या औषधालाही मी महाग आहे...

जालन्यातील एका वकिलाने घरात वारंवार होणाऱ्या चोरीला कंटाळून थेट चोराला उद्देशून निवेदन केले आहे. त्यात या वकिलाने चोरी करण्याच्या कलेला वंदन करत चोरट्याला आपल्या दरमहा औषधांच्या खर्चाचा दाखला देत आपल्या घरी चोरी न करण्याचे आवाहन केले आहे. मी आपली जोखीम, तंत्रज्ञान, समन्वय, जीवावर ऊदार होऊन चोरी करण्याच्या कलेला वंदन करतो. हे काम खूप अवघड आहे, असे या वकिलाने आपल्या पत्रात म्हटले आहे.

वकील ललीत हट्टेकर असे या पीडित वकिलाचे नाव आहे. ते जालनाशहरातील एसटी कॉलनीत राहतात. आतापर्यंत त्यांच्या घरी तब्बल 4 वेळा चोरी झाली आहे. वारंवार होणारी चोरी आणि पोलिसांच्या दुर्लक्षामुळे त्यांनी थेट चोरालाच आपल्या घरी चोरी न करण्याचे विनम्र आवाहन केले आहे. त्यांच्या या निवेदनावर सध्या जालना जिल्ह्यातील पोलिस व न्यायपालिका वर्तुळात खमंग चर्चा रंगली आहे.

खाली वाचा वकिलाचे चोराला निवेदन जशास तसे

वकील ललीत हट्टेकर आपल्या पत्रात चोराला उद्देशून म्हणतात, मला तुम्हाला भेटून बोलायचे आहे. पण आपली ओळख नसल्यामुळे मी हे निवेदन करतो की, गेल्या 6 महिन्यांत तुम्ही 4 वेळा माझ्यासारख्या माणसाकडे आला. 3 वेळा तुमच्या पदरी निराशाच पडली. मात्र, एक वेळ माझ्याकडून खूप काही घेऊन गेला. मी माझ्या आयुष्यात पुन्हा ते कमाऊ शकत नाही. त्याचवेळी मी पोलिस स्टेशन येथे तक्रार केली. परंतु, तुम्हाला पोलिस पकडू शकले नाही. 3 वेळा तक्रार सुद्धा केली नाही. माझी वकिली फक्त माझा व कुटुंबाचा योगक्षेम चालावा इतकीच आहे. मानाने आणि स्वाभिमानाने जगता यावे इतकेच पैसे मी कमावतो. मला सगळे रोग आहेत. त्याच्या गोळ्यांचा व औषधांचा खर्च जवळपास 10 हजार रु. होतो.

तुमच्यामुळे जे तुम्ही दरवाजे, कोंडे तोडता व निघून जाता त्यामुळे मला विनाकारण खर्च होतो व पत्नी, मुलगा दहशतीत जगतात. मला तुमच्यामुळे दोन दरवाजे 15 हजार रु, लोखंडी कपाट दुरुस्ती 4500 रु, सीसीटीव्ही. 27000 रु लोखंडी ग्रील 410 किलोचे व मजुरी असे मिळून 35000 रु. हा खर्च झाला आहे. कॅमेरे जे काढल्यानंतर काहीच ऊपयोग होत नाही ते सुद्धा तुम्ही 2 वेळेला नेले. त्याचा 6000 रु. खर्च झाला. त्या सर्वांची उधारी मी आज सुद्धा देत आहे.

माझे घर एका कोपऱ्यात आहे. आजूबाजूला मोठ्या - मोठ्या भिंती आहेत व समोर मोकळी जागा आहे. त्यामुळे तुम्हाला चोरीसाठी एक आदर्श जागा वाटते. तुम्हाला कोणाला वाटत असेल तर मी जागा सुद्धा तुम्ही जर माझी लाळ पडेल इतकी रक्कम सांगितली तर 1 वर्षानंतर विकू शकतो (माझे आईच्या वर्ष श्राद्ध झाल्यानंतर). इथे 6000 चौ. फुटांमध्ये तुम्ही सगळ्या प्रकारचे अवैध धंदे करू शकता. कोणतीही रिस्क नाही. सेफ आहे. बघा विचार करून.

अजून एक राहिले. घरासमोरचा खंबा हा पूर्ण पाण्यात आहे. त्या रस्त्याने जाऊ नका. अर्थिग लागते. मी लाईट लावायला गेलो होतो तेव्हा मला जोरात झटका बसला होता, असा इशाराही ललीत हट्टेकर यांनी चोराला दिला आहे.

शस्त्र परवाना असल्याचा इशारा

आता महत्वाचे. माझ्याकडे शस्त्र परवाना आहे. त्यामुळे जर तुमच्या दुर्दैवाने तुम्ही सापडला, तर मी मारता - मारता मरेन या तत्वाने त्याचा उपयोग करेल व विनाकारण मला जीव हत्येचे पाप लागेल. आता माझ्याकडे सोने-चांदी-पैसे वगैरे काहीही नाही. घरात फक्त मी, बायको, मुलगा, भांडे-कुंडे, कपडे, फ्रीज, वॉशिंग मशिन, टी.व्ही., गाडी तिही टीव्हीएस तिला पुर्नमूल्य नाही. 2 मोबाईल आहेत. तरी तुमचा वेळ व माझा संयम दोन्हीही वाया घालवू नका ही हात जोडून विनंती, अशी विनंती वकील हट्टेकर यांनी चोरट्याला केली आहे.

आपली शाळा, महविद्यालय,संस्था व संघटना यांच्या बातम्या, फोटो 7588005002 या नंबर वर व्हॉट्स ॲप वर पाठवा....कथा,कविता,पुस्तक परीक्षण, वैचारिक लेखन देखील उपरोक्त नंबर पाठवावे