MBBS परीक्षेचा पेपर फुटला?:परीक्षेला पाऊणतास विलंब? विद्यार्थ्यांचे नुकसान टाळण्यासाठी दिला बदललेला पेपर

महाराष्ट्र आरोग्य विज्ञान विद्यापीठाच्या वतीने घेण्यात येणाऱ्या एमबीबीएस परीक्षेचा अंतिम पेपर फुटल्याची माहिती समोर आली आहे. यामुळे ऐनवेळी पेपर बदलण्यात आला. त्यामुळे ही परीक्षा पाऊणतास उशिराने सुरू करण्यात आली. वास्तविक अनावधानाने घडलेल्या या प्रकारानंतर विद्यापीठाच्या वतीने तातडीने उपाय-योजना करण्यात आल्या होत्या. मात्र, पेपर उशीरा सुरु झाल्याने एमबीबीएसच्या विद्यार्थ्यांना नाहक मनस्ताप सहन करावा लागला.

नागपूर आणि अमरावती या दोन परीक्षा केंद्रावर हा प्रकार घडल्याची माहिती समोर आली आहे. मिळालेल्या माहितीनुसार एमबीबीएसच्या प्रथम वर्षाचा हा शेवटचा पेपर होता. मात्र, या पेपरला परीक्षा केंद्रावर चांगलाच गोंधळ उडाला. निर्धारित वेळापत्रकानुसार पेपर न घेता तब्बल पाऊणतास उशिराने परीक्षा सुरू करण्यात आली.‘बायोकेमेस्ट्री’ या विषयाचा दुसरा आणि अभ्यासक्रमातील अंतिम थेअरी पेपर असल्याची माहिती काही विद्यार्थ्यांनी दिली आहे. या विद्यार्थ्यांचा पहिला थेअरी पेपर सोमवारी झाला आहे. यावेळी द्वितीय पेपर एका परीक्षा केंद्रावर वितरित केल्या गेला. हा प्रकार लक्षात येताच तो विद्यार्थ्यांकडून परत घेण्यात येऊन पहिला पेपर देण्यात आला. मात्र, बुधवारी (ता. आठ) असलेला पेपर सोमवारीच वितरित झाल्याने तो लीक झाला असावा, असा संशय वाढला होता. त्यामुळे गोंधळ निर्माण झाला. अखेरीस वेळेवर दुसरा पेपर विद्यार्थ्यांना देण्यात आला. त्यामुळे परीक्षा सुरु होण्यास विलंब झाला.

50 परीक्षाकेंद्रावर बायोकेमिस्ट्री भाग 2 विषयाचा दुसरी प्रश्नपत्रिका

अनावधानाने अगोदरच उघडण्यात आलेल्या प्रश्नपत्रिकेसाठी विद्यापीठाकडून तातडीने उपाययोजना करण्यात आली. विद्यापीठाचे परीक्षा नियंत्रक डॉ. संदीप कडू यांनी सांगितले की, महाराष्ट्र आरोग्य विज्ञान विद्यापीठाच्या हिवाळी-2023 सत्राच्या लेखी परीक्षा (दि.28 ऑक्टोबर 2023 ते 08 नोव्हेंबर 2023) कालावधीत घेण्यात येत आहेत. राज्यभरातील पन्नास परीक्षा केंद्रावर या परीक्षा सुरू आहेत. दि. 06 नोव्हेंबर 2023 रोजी एका परीक्षा केंद्रावर अनवधानाने एम.बी.बी.एस-2019 च्या अभ्यासक्रमाच्या बायोकेमिस्ट्री भाग एक विषयाऐवजी बायोकेमिस्ट्री भाग दोनची विषयाची प्रश्नपत्रिकेचा बॉक्स उघडण्यात आला. बायोकेमिस्ट्री भाग दोनची विषयाची परीक्षेचे आयोजन (दि. 08 नोव्हेंबर 2023) रोजी करण्यात आले होते. सदर बाब लक्षात येता विद्यापीठाने तातडीने उपाययोजना केली. कुलगुरू महोद्या यांच्या आदेशानुसार राज्यातील 50 परीक्षाकेंद्रावर बायोकेमिस्ट्री भाग 2 विषयाचा दुसरी प्रश्नपत्रिका विद्यापीठामार्फत पुरविण्यात आली असल्याचे त्यांनी सांगितले.

तत्परतेने कार्यवाही करण्यात आली

तातडीच्या प्रश्नपत्रिका बदलण्यामुळे परीक्षा पुढे ढकलण्याचा प्रसंग टाळण्यात आला. परीक्षा प्रक्रियेत अडचणी निर्माण होऊ नयेत तसेच विद्यार्थ्यांचे शैक्षणिक नुकसान होऊ नये यासाठी विद्यापीठाकडून तत्परतेने कार्यवाही करण्यात आली होती. एम.बी.बी.एस-2019च्या अभ्यासक्रमाच्या परीक्षेकरीता राज्यभरातील एकूण 8395 विद्यार्थी प्रविष्ट झाले आहेत. सदर परीक्षा केंद्रावर घडलेल्या घटनेबाबत विद्यापीठामार्फत चौकशी करण्यात येत आहे.